dEputación dA coruña
“Camiño da Inclusión: Viaxe a unha vida digna”. Este proxecto busca visibilizar e poñer en valor o papel das Empresas de Inserción (EI) na creación dun tecido económico máis sostible, inclusivo e responsable na provincia da Coruña. A través de accións formativas, informativas e de difusión, preténdese sensibilizar á cidadanía, empresas locais e á mesma administración pública sobre os beneficios económicos e sociais de apoiar e colaborar coas EI. Ademais, o proxecto busca fortalecer a rede de colaboración entre as EI e o tecido empresarial local para potenciar a integración laboral de persoas en situación ou risco de exclusión social.
As Empresas de Inserción traballan para integrar a persoas en situación de vulnerabilidade social no mercado laboral, proporcionando oportunidades de emprego e formación. Comprar produtos e servizos destas empresas é unha acción de solidariedade que apoia directamente a estes colectivos.
E finalmente, na campaña destacamos o impacto transformador: CAMIÑO DA INCLUSIÓN, pon de relevo o impacto positivo que as Empresas de Inserción teñen na vida das persoas. Non se trata só de adquirir un produto ou servizo, senón de contribuír a un cambio real e significativo na comunidade. Cada compra axuda a transformar vidas, proporcionando emprego, dignidade e autonomía a quen máis o necesitan.
Dentro do noso traballo, destacamos a loita pola inserción social dos colectivos en situación ou risco de exclusión social. Consideramos que o fomento do emprego e o apoio ao comercio están directamente ligados ao mantemento/crecemento da actividade a nivel económico das empresas de inserción, e dito crecemento reflicta novas oportunidades laborais para colectivos en risco de exclusión social.
OBXECTIVOS
- Incrementar a visibilidade e o recoñecemento das EI e do seu impacto social e económico.
- Promover a contratación e compra responsable de produtos e servizos das EI por parte de empresas, administracións públicas e cidadanía.
- Fomentar a colaboración entre as EI e o tecido empresarial local para facilitar a integración laboral das persoas que completan os itinerarios de inserción.
- Sensibilizar sobre a importancia da inclusión sociolaboral como parte dunha economía sostible e comprometida cos Obxectivos de Desenvolvemento Sostible (ODS).
FINANCIACIÓN
Actividade subvencionada en exclusiva pola Deputación da Coruña, mediante a convocatoria do Programa de subvencións dirixida a entidades empresariais sen ánimo de lucro da Provincia da Coruña para a realización de actividades de promoción económica, durante o ano 2025 (FOENAA 2025).
ACTIVIDADES
Camiño da Inclusión: viaxe a unha vida digna, unha peza audiovisual que pon en valor o papel fundamental das Empresas de Inserción na construción dunha sociedade máis xusta, inclusiva e sostible.
A través deste vídeo achegámonos ao día a día das Empresas de Inserción da provincia da Coruña: os seus espazos de traballo, os produtos e servizos que ofrecen e, sobre todo, as historias reais das persoas que forman parte destes proxectos.
Porque detrás de cada emprego hai unha oportunidade.
E detrás de cada oportunidade, unha historia de superación.
Os testemuños recollidos amosan o impacto real destas iniciativas: “Non só é un traballo, é volver sentirme útil e recuperar a confianza en min mesma.”
As Empresas de Inserción non só xeran emprego, senón que acompañan ás persoas nun proceso de crecemento persoal e profesional, facilitando a súa incorporación ao mercado laboral en condicións de igualdade.
Este vídeo é tamén unha chamada á acción:
Á cidadanía, para apoiar o consumo responsable.
Ás empresas, para apostar por modelos de colaboración inclusivos.
Ás administracións, para seguir impulsando políticas que favorezan a inclusión sociolaboral.
Convidámoste a ver, compartir e formar parte deste camiño.
👉 Porque apoiar ás Empresas de Inserción é apostar polas persoas.
Stand informativo: AEIGA tamén está presente en ferias e espazos públicos, neste caso o 12 de decembro montamos un STAND INFORMATIVO sobre Empresas de Inserción no Mercado de Abastos de Santiago de Compostela, coa exposición de produtos de empresas de inserción.
O pasado 12 de decembro de 2025, a Asociación de Empresas de Inserción de Galicia (AEIGA) participou nun stand informativo na Praza do Mercado de Abastos, no marco do programa Camiño da Inclusión: viaxe a unha vida digna.
Esta actividade tivo como principal obxectivo achegar á cidadanía o labor das Empresas de Inserción, dando a coñecer o seu papel na xeración de oportunidades laborais para persoas en situación ou risco de exclusión social, así como a súa contribución a unha economía máis xusta, sostible e comprometida co territorio.
Durante a xornada, as persoas asistentes puideron:
- Coñecer de primeira man os produtos e servizos ofrecidos polas Empresas de Inserción.
- Acceder a información sobre a economía social e a importancia da contratación e do consumo responsable.
- Visualizar o vídeo Camiño da Inclusión, a través de códigos QR dispoñibles no stand.
- Participar en actividades divulgativas orientadas á sensibilización social.
Esta acción permitiu crear un espazo de encontro directo entre as Empresas de Inserción e a cidadanía, favorecendo o coñecemento mutuo e poñendo en valor o impacto social destas entidades.
Dende AEIGA seguimos traballando para visibilizar o papel das Empresas de Inserción e promover unha sociedade máis inclusiva, na que todas as persoas teñan oportunidades reais de desenvolvemento persoal e profesional.