Desde AEIGA (Asociación de Empresas de Inserción de Galicia) e AGACA (Asociación Galega de Cooperativas Agroalimentarias) presentamos o Estudo sobre perdas e desperdicio alimentario na distribución en Galicia e oportunidades de reaproveitamento desde a economía social, elaborado conxuntamente como exercicio de colaboración entre o tecido das empresas de inserción e o movemento cooperativo galego. Trátase dunha análise pioneira que achega unha radiografía do que acontece nos puntos críticos da cadea de distribución e identifica solucións concretas de colaboración entre distribución e economía social para reducir perdas, valorizar excedentes e impulsar a inclusión sociolaboral no territorio.
O informe ofrece unha mirada práctica para activar alianzas, mellorar procesos e orientar decisións nun contexto de crecente esixencia social e normativa.
Que achega o informe
- Diagnóstico estruturado das prácticas actuais de xestión de alimentos na distribución (recepción, almacenaxe, exposición/venta, xestión de non vendidos e destinos finais).
- Catálogo de boas prácticas e estratexias de prevención e reaproveitamento, con exemplos transferibles a diferentes operadores.
- Mapa de oportunidades de colaboración entre distribución e economía social (cooperativas agroalimentarias e empresas de inserción), con vías de transformación, valorización e comercialización responsable.
- Pautas operativas para a doazón e redistribución de alimentos aptos, con criterios de seguridade, trazabilidade e loxística.
- Recomendacións accionables para avanzar cara a modelos máis eficientes, xustos e sostibles.
Obxectivos do estudo
- Identificar as prácticas actuais de xestión de alimentos nos axentes operadores de distribución e avaliar o nivel de perdas e desperdicio.
- Investigar e documentar boas prácticas e estratexias exitosas de prevención e reaproveitamento.
- Identificar oportunidades de colaboración entre distribución e economía social do sector hortofrutícola.
- Explorar vías de redistribución e doazón de alimentos non vendidos pero aptos a través de entidades de economía social.
- Fomentar a competitividade e o posicionamento das entidades de economía social.
Este estudo reforza o compromiso compartido de AEIGA e AGACA coa economía circular e cun modelo alimentario máis eficiente e inclusivo en Galicia. Convidámoste a descargar o informe e a descubrir como a colaboración entre a distribución, as cooperativas e as empresas de inserción pode converter perdas en oportunidades con impacto social e ambiental positivo.
Descarga o Estudo sobre perdas e desperdicio alimentario na distribución en Galicia – AEIGA25-maqueta-GL_compressed
Esta actividade enmárcase no programa de actuación 2024–2025 da Rede Eusumo. A Rede Eusumo é unha rede de colaboración impulsada pola Secretaría Xeral de Emprego e Relacións Laborais da Consellería de Emprego, Comercio e Emigración para o fomento do cooperativismo e a economía social, que conta co financiamento do Ministerio de Traballo e Economía Social.