Estudo de Sostibilidade das Empresas de Inserción
Desde AEIGA, Asociación de Empresas de Inserción de Galicia, presentamos o noso primeiro Estudo de Sostibilidade das Empresas de Inserción socias de AEIGA, unha análise pioneira que pon en valor o traballo das nosas empresas socias en materia de sostibilidade e responsabilidade social. Este informe, elaborado en base aos principios do estándar Global Reporting Initiative (GRI) e aos Obxectivos de Desenvolvemento Sostible (ODS), ofrece unha visión integral do impacto social, ambiental e económico das empresas de inserción na nosa comunidade.
O estudo analiza en profundidade tres dimensións clave da sostibilidade – social, ambiental e gobernanza – destacando as boas prácticas, retos e oportunidades que as nosas empresas atopan no seu camiño cara á creación dun futuro máis sostible e inclusivo. A través de datos reais e un enfoque comprometido co desenvolvemento sostible, conseguimos plasmar o esforzo conxunto das empresas de inserción galegas por mellorar a súa eficiencia operativa e fortalecer a súa responsabilidade corporativa, aportando valor ao conxunto da sociedade.
Obxectivos do Estudo:
• Ofrecer un diagnóstico detallado do estado da sostibilidade nas empresas de inserción galegas.
• Identificar boas prácticas e áreas de mellora en aspectos como a pegada de carbono, a xestión de residuos, a igualdade de oportunidades e a transparencia en gobernanza.
• Servir como ferramenta de apoio e mellora continua para as empresas de inserción e para o conxunto da economía social.
• Visibilizar o traballo das nosas entidades socias, reforzando o seu papel como axentes clave na consecución dos ODS en Galicia.
Con este estudo, AEIGA busca reforzar o compromiso do sector coa sostibilidade, avanzando na súa misión de promover un modelo de negocio responsable, inclusivo e centrado na creación de oportunidades para persoas en risco de exclusión. Convidámosvos a descargar o informe e a descubrir como as empresas de inserción galegas contribúen ao desenvolvemento sostible.
Descarga o Estudo de Sostibilidade das Empresas de Inserción Galegas -Descarga
Esta actividade enmárcase no programa de actuación 2024-2025 da Rede Eusumo. A Rede Eusumo é unha rede de colaboración impulsada pola Secretaria Xeral de Emprego e Relacións Laborais da Consellería de Emprego, Comercio e Emigración para o fomento do cooperativismo e a economía social que conta co financiamento do Ministerio de Traballo e Economía Social.